Qeveria e Kosovës në mbledhjen e sotme ka miratuar Koncept-dokumentin për themelimin e mekanizmit për dokumentimin e krimeve të kryera gjatë luftës në Kosovë.
Kryeministri i Kosovës, Albin Kurti gjatë mbledhjes theksoi se kanë kaluar 22 vite pas luftës dhe adresimi i krimeve të kryera gjatë luftës është shumë larg prej asaj që ne duam e na duhet.
“Nuk mund të zhbëjmë të kaluarën e as ta kthejmë kohën mbrapa për të adresuar krimet që duhej të ishin adresuar kohë më parë, por mund të bëjmë më të mirën në rrethanat në të cilat jemi. Shkeljet e rënda të drejtave të njeriut, krimet e luftës, do të trajtohen nga mekanizimi për dokumentimin e krimeve të kryera”, ka thënë Kurti.
Ndërsa, ka shtuar se koncept-dokumenti rekomandon themelimin e mekanizimit me anë të një ligji të veçantë.
Ministrja e Drejtësisë, Albulena Haxhiu, ka thënë se qëllimi i mekanizmit është që krimet të mblidhen, verifikohen, sistemohen, të ruhen dhe të jenë të qasshme.
”Qëllimi i krijimit është që krimet që kanë ndodhë të mblidhen, të verifikohen dhe të jenë të qasshme për viktimat, për shoqërinë dhe pastaj për institucionet e drejtësisë”, tha Haxhiu.
Gjatë periudhës së luftës së fundit në Kosovë 1998-1999, janë vrarë rreth 13 mijë e 500 persona.
Prej këtyre viktimave, 76 për qind besohet se ishin civilë. Ndërkaq, për nga përkatësia etnike, 10 mijë e 794 janë shqiptarë, 2 mijë e 197 serbë, kurse të tjerët u përkasin përkatësive tjera etnike.
Ndërkohë janë edhe rreth 1 mijë e 600 persona ende të pagjetur nga lufta, kryesisht shqiptarë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
