Itali, anija me emigrantë “trazon” akoma më tej qeverinë në krizë (VIDEO)

Një tjetër anije me emigrantë pranë brigjeve të Italisë është kthyer në qendrën e debatit politik të vendi fqinj. Mjeti lundrues me 147 emigrantë ka 13 ditë në det të hapur, pasi zv.kryeministri dhe ministër i Brendshëm, Mateo Salvini, lëshoi një urdhër që ndalon ankorimin e saj në portet italiane. Anija iu drejtua një porti pasi një gjykatë në Romë e pezulloi urdhrin e Salvinit, por megjithatë nuk i është afruar bregut nga frika e përsëritjes së episodit të qershorit, kur në një rast të ngjashëm u arrestua kapiteni i anijes.

Rasti ka trazuar politikën dhe qeverinë italiane, e përçarë jo pak javët e fundit.

Salvini ka lëshuar një tjetër urdhër bllokues për anijen që priste të hynte në portin në Lampeduzës, por ministrja e mbrojtjes, e cila është anëtare e partisë partnere të koalicionit, Lëvizja Pesë Yjet, refuzoi ta firmosë këtë urdhër.

Duke sfiduar hapur Salvinin, i cili deri më tani ka diktuar politikën e imigrimit të Italisë, Elisabetta Trenta tha se kundërshtimi i vendimit të gjykatës është shkelje e ligjit dhe se "politika nuk duhet të humbasë humanizmin e saj".

Ndërkohë, në një letër të hapur drejtuar Salvinit, kryeministri Xhuzepe Konte, shprehet se disa vende të BE-së janë ofruar për t’i pritur emigrantët që mbeten të bllokuar në anije. Konte ka garantuar se emigrantët, të cilët u kapën në brigjet e Libisë në fillim të gushtit, do të ndahen midis Francës, Gjermanisë, Rumanisë, Portugalisë, Spanjës dhe Luksemburgut.

Ndërhyrja e kreut të qeverisë italiane vjen në mes të një krize tjetër qeveritare, e cila mori plotësisht formë kur Salvini njoftoi se dëshiron t’I japë fund koalicionit midis partisë së tij Lega dhe Lëvizjes Pesë Yje dhe të shpallë zgjedhjet e parakohshme.

Ndërkohë, organizata e bamirësisë, Open Arms, ka dhënë alarmin për kushtet e rënda në të cilat janë emigrantët në anije. Vullnetarët e saj thonë se gjendja shëndetësore dhe psikologjike e emigrantëve është rënduar dhe ndërhyrja është e domosdoshme.