Ish-Presidenti i Kosovës, Hashim Thaçi, ka arritur në Kosovë pesë ditë pas vdekjes së babait të tij. Ai ka bërë homazhe te varri i babait në Burojë të Skenderajt.
Nga Rotterdami, Thaçi ka arritur në Aeroportin e Prishtinës rreth orës 10 ndërkaq është përcjell nën masa të rrepta sigurie nga zyrtarë e policë të EULEX-it.
“Te varri i yt erdha i fundit, babë. Para meje erdhën mijëra qytetarë. Së shpejti, dorë më dorë, do t’i falënderojë të gjithë! Të qoftë i lehtë dheu i Kosovës”.
Ky ishte mesazhi i ish-presidentit, Hashim Thaçi, në kurorën që ia la te varri i babait të tij.
Gjykata Speciale e Kosovës nuk e kishte lejuar Thaçin të vijë nga Haga në ditën e varrimit edhe pse avokati i tij konfirmoi se kanë bërë kërkesë.
Ndërkohë vizita e sotme në Kosovë është konfirmuar nga Specialja, duke njoftuar se ai është lejuar të bëjë nderime dhe të jetë me familjen e ngushtë
“Mund të konfirmoj se për arsye bindëse humanitare, trupi gjykues dhe gjyqtari i procedurës paraprake kanë udhëzuar Sekretarin që të menaxhojë një vizitë në paraburgim në Kosovë për Hashim Thaçin që t’i bëjë nderimet dhe të jetë me familjen e ngushtë. I akuzuari mbetet në paraburgim dhe në paraburgim nga Dhomat e Specializuara”, ka thënë Michael Doyle, zëdhënës i Dhomave të Specializuara të Kosovës
Thaçi e takoi babanë për herë të fundit më 13 mars, kur i bëri vizitë në QKUK.
Ndaj ish-presidentit e ish-kryeministrit të Kosovës, Specialja ka ngritur dy aktakuza, për krime lufte dhe për ndikim te dëshmitarët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
