Një bandë shqiptarësh që shfrytëzonte vajza të reja, të cilat prostituonin në Milano, është goditur nga policia italiane. Operacioni i koduar “Tregtar në Fier” ka çuar në pranga 25 persona, pothuajse të gjithë nga Fieri. Ata duhet të përgjigjen para drejtësisë italiane për akuzat e favorizimit të prostitucionit dhe trafikut të lëndëve narkotike, pasi hetimet kanë zbuluar se një pjesë e atë ardhurave nga prostitucioni përdorej për blerjen e lëndëve narkotike si heroina dhe kokaina.
Grupi kishte krijuar zonën e vetë të influencës dhe grupet e tjera të prostitucionit duhej t’i paguanin taksë për t’i lejuar vajzat e tyre të dilnin në rrugë. Vajzat shfrytëzoheshin për të siguruar fitime që varionin nga 8-12 mijë euro në muaj.
Organizata kriminale bazohej mbi lidhjet familjare të pjesëtarëve. Në krye të saj qëndronin tre persona: Kristian Marku (Daja) 45 vjeç, Renato Arapi (Kaci), 37 vjeç dhe Oridian Fslliaj (Ori), 31 vjeç.
Bandat e tjera të prostitucionit u paguanin atyre një taksë 50-100 euro kundrejt “lejes” për të nxjerrë vajzat e tyre në rrugë.
“Jam i zoti i vendit”, citohet kreu i grupit të shqiptarëve në përgjimet e kryera nga autoritetet italiane. Rreth 37 mijë euro kesh u kapën në momentin e arrestimit të shqiptarëve.
Ndërkohë, edhe vajzat e shfrytëzuara kanë rrëfyer dhunën dhe kërcënimet me të cilat përballeshin para se të dilnin në rrugë. “Nëse e përdor më celularin ndërsa punon, të bëj ta hash. Do ta paguash shtrenjtë. Kur të kthehesh në shtëpi do të të thyej kokën”, ishin kërcënimet e tutorëve para se ato të dilnin në rrugë. Një prej tyre ka rrëfyer se i kishin derdhur vaj të nxehtë në këmbë, ndërsa një tjetër ishte dhunuar aq barbarisht, saqë kishte pësuar dëmtime në timpanin e veshit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
