Detaje nga makina e djegur në Bilisht, i përket personit të akuzuar nga Deizi Arapi

Mësohet se makina e djegur gjatë orëve të natës në Bilisht i përket shtetasit Marsel Buqo, punonjës në një karburant në këtë qytet.

Sipas burimeve, Buqo është shtetasi i akuzuar nga Deizi Arapi, të cilës ju dogj mjeti pak javë më parë. Zjarrvënia e sotme sipas policisë dyshohet e qëllimshme. Sjellim në vëmendje që 27- vjeçares i është djegur dy herë makina. Dy muaj më parë ajo u arrestua pasi u konfliktua me policinë gjatë shoqërimit në Komisariat pas ankesave të banorëve për prishje të qetësisë publike.

Sot në njoftimin e policisë thuhet: “Gjithashtu rreth orës 02:30, në qytetin e Bilishtit, ka rënë zjarr në automjetin tip ‘Volksvagen’ në pronësi të shtetasit M. B., i cili ka qenë i parkuar përpara banesës së tij. Grupet hetimore po punojnë për sqarimin e rrethanave dhe përcaktimin e shkaqeve të aksidentit dhe rënies së zjarrit”.