Një ngjarje e pazakontë u regjistrua në Librazhd, ku një 36-vjeçar është arrestuar pasi dyshohet se iu dha Valium prindërve të bashkëshortes së tij dhe më pas u vodhi një shumë parash dhe një celular.
Pas njoftimit se dy bashkëshortë ishin dërguar fillimisht në spitalin e Librazhdit dhe më pas në QSUT në gjendje të rënduar shëndetësore, policia organizoi menjëherë hetimet për zbardhjen e rrethanave të ngjarjes.
Punonjësit e Komisariatit të Policisë Librazhd arritën të identifikojnë, kapin dhe arrestojnë autorin e dyshuar, shtetasin Ismail Kllogjri, 36 vjeç.
Nga hetimet rezultoi se autori, i afërm familjar i çiftit të moshuar (dhëndri i tyre), dyshohet se u ka administruar atyre një dozë të lartë medikamenti qetësues, të dyshuar si valium, duke shkaktuar dëmtime të rënda shëndetësore, dhe më pas ka vjedhur një shumë parash në banesën e tyre. Të dy bashkëshortët ndodhen nën kujdesin e mjekëve dhe janë jashtë rrezikut për jetën.
Në cilësinë e provës materiale u sekuestruan shuma e parave të vjedhura dhe një celular.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
