Ish-deputeti i PD Xhemal Gjunkshi, përmes rrjeteve sociale ka reaguar në lidhje me arrestimin e një 35-vjeçari ditën e djeshme në Dibër.
Gjunkshi thotë se personi në fjalë, i shpallur në kërkim ndërkombëtar për lidhje me lëndët narkotike, është djali i një polici në detyrë në Maqellarë.
“35 vjeçari Vranezi është djali i Policit Qemal Vranezi, me detyrë Përgjegjës i Postës së Policisë në Maqellarë. Edhe pse ishte prej disa muajsh në Dibër , Besmir Vranezi endej i lirë dhe i pa shqetësuar nga policia lokale, deri sa këta të fundit, u detyruan të ekzekutojnë urdhër arrestin e ardhur nga Prokuroria Italiane për "trafikim të lëndëve narkotike" dhe “pjesëmarrje në organizatë kriminale", citohet nga mesazhi i Gjunkshit, shpwrndarw nga PD.
Sipas tij, për shkak të kësaj lidhje, Besmir Vranezi, endej i lirë në Dibër pavarësisht se kishte disa muaj që qëndronte në këtë qytet.
Ish-deputeti shkon më tej duke deklaruar se mbrojtja vjen nga kupola e Partisë Socialiste.
“Kush qëndron pas babait polic dhe të birit trafikant? Mbrojtja vjen nga kupola drejtuese e Partisë Socialiste në pushtet”, shprehet Gjunkshi.
Besmir Vranezi, 35-vjeç, i shpallur në kërkim për trafik droge dhe organizatë kriminale u arrestua të premten në Peshkopi, vendin e tij të lindjes. Ndaj 35-vjeçarit, Gjykata e Trentos më 1 shkurt ka lëshuar arrestin ndërkombëtar dhe pritet ekstradimi i tij drejt Italisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
