Solli “Audi”-n e vjedhur me vlerë 50 mijë euro nga Italia për shitje në Shqipëri, procedohet 44-vjeçari

Një 44-vjeçar është proceduar penalisht nga policia në Tiranë, në kuadër të operacionit të koduar “Stolen Line”.

Policia sekuestroi një automjet tip “Audi SQ8”, me vlerë rreth 50 000 euro, i cili, nga verifikimet, rezultoi i vjedhur në Itali.

Nga veprimet hetimore dhe verifikimet e kryera, u identifikua dhe u procedua penalisht shtetasi V. T., 44 vjeç, i dyshuar se e ka sjellë automjetin në Shqipëri me qëllim shitjen e tij.

Sipas burimeve zyrtare, automjeti është bllokuar si provë materiale, ndërsa ndaj shtetasit të dyshuar ka nisur procedimi penal për trafikimin e mjetit të vjedhur. Materialet i janë referuar Prokurorisë së Tiranës për veprime të mëtejshme.

Operacioni “Stolen Line” vijon ende në terren me synim goditjen e rasteve të ngjashme të trafikimit të mjeteve të vjedhura jashtë vendit.