Rrëshqitje dherash pranë fshatit Vllahinë kanë bllokuar segmentin rrugor që të çon drejt kësaj zone. Reshjet intensive të së mërkurës kanë shkaktuar probleme edhe në këtë aks, ku masivet e dheut kanë penguar qarkullimin e automjeteve nga fshati Peshkopi drejt Vllahinës dhe Pocemit, por edhe në drejtim të kundërt.
Kjo rrugë ishte riasfaltuar pak kohë më parë, duke u lidhur me rrugën e re të Pocemit, e cila bashkohet me autostradën Levan-Tepelenë dhe u inaugurua vetëm pak muaj më parë. Megjithatë, rrëshqitja e dherave ka krijuar vështirësi, duke sjellë bllokimin e plotë të qarkullimit për rreth 45 minuta dhe shkaktuar trafik të konsiderueshëm.
Dhjetëra mjete janë detyruar të qëndrojnë në pritje deri në mbërritjen e mjeteve punuese për largimin e dherave dhe hapjen e rrugës.
Situata e krijuar këtë të mërkurë nxori në pah edhe mungesën e barrierave mbrojtëse në anë të rrugës, një problematikë që e përkeqësoi situatën pas reshjeve, duke vështirësuar lëvizjen e banorëve të disa fshatrave të zonës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
