Agjencia e Mbikëqyrjes Policore (AMP) ka njoftuar pezullimin nga detyra të katër punonjësve të Policisë në Berat, pas akuzave për shpërdorim detyre gjatë ushtrimit të funksioneve të tyre.
Veprimet e AMP-së, të kryera në bashkëpunim me Prokurorinë e Juridiksionit të Përgjithshëm Berat, zbuluan se efektivët dhe inspektori në fjalë, me veprime dhe mosveprime, kishin favorizuar ose penalizuar drejtues mjetesh të konstatuar në shkelje të Kodit Rrugor.
Vendimi u mor pas ekzekutimit të urdhrit të Gjykatës së Shkallës së Parë të Juridiksionit të Përgjithshëm Berat, duke u aplikuar masa ndalimi për ushtrimin e detyrës, sipas nenit 242 të Kodit të Procedurës Penale, për veprën penale të shpërdorimit të detyrës, të parashikuar në nenin 248 të Kodit Penal.
Katër punonjësit e pezulluar janë:
Inspektor A.S., Trupë shërbimi, Seksioni për Trafikun Urban dhe Interurban, DVP Berat;
Inspektor M.D., Trupë shërbimi, Seksioni për Trafikun Urban dhe Interurban, DVP Berat;
Inspektor A.Q., Trupë shërbimi, Seksioni për Trafikun Urban dhe Interurban, DVP Berat;
Inspektor K.G., Oficer i Patrullës së Përgjithshme, Komisariati i Policisë Berat.
AMP thekson se mbetet e përkushtuar ndaj misionit për garantimin e zbatimit të ligjit dhe i bën thirrje qytetarëve të denoncojnë çdo rast abuzimi apo shkeljeje nga punonjësit e strukturave të Policisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
