Të shtëna me armë zjarri në ajër, policia vihet në ndjekje të jahtit në Palasë

Të shtëna me armë zjarri nga një jaht përballë Palasës kanë alarmuar policinë e Himarës. 

Sipas njoftimit, efektivë te policisë së Himarës dhe Dhërmiut janë vënë në ndjekje të mjetit lundrues. 

 

Himarë/Informacion paraprak

 

Rreth orës 21:00 është njoftuar se nga një jaht në det, përballë Palasës, dyshohet se është qëlluar me armë zjarri në ajër.

 

Menjëherë pas marrjes së njoftimit, shërbimet e Policisë Kufitare dhe të Njësisë Policore Detare janë vënë në ndjekje të jahtit.

 

Njëkohësisht, janë njoftuar edhe shërbimet e Komisariatit të Policisë Himarë dhe të Stacionit të Policisë Dhërmi, të cilat po kryejnë kontrolle nga toka përgjatë vijës bregdetare.

 

Vijon ndjekja e mjetit lundrues, me qëllim verifikimin e informacionit dhe dokumentimin e plotë të ngjarjes.

 

Në përfundim të operacionit për ndalimin e jahtit dhe të veprimeve të para hetimore do të jepet informacion i plotë për rastin.