Është ekstraduar në Kosovë nga autoritetet e Shqipërisë një i dyshuar për vrasjen e Haxhi Ahmetit që kishte ndodhur në fshatin Smolicë të Gjakovës më 14 tetor të vitit 2018, ka njoftuar Policia e Kosovës.
Sipas raportit 24-orësh të Policisë, i ekstraduari dyshohet për veprën penale të “vrasjes së rëndë” dhe “përdorim të armës apo mjetit eksplodues”.
“Fshati Smolicë, Gjakovë 14.10.2018-08:00. Në lidhje me rastin më 19.04.2021 nga autoritetet e R. Shqipërisë është ekstraduar i dyshuari mashkull shtetas i Shqipërisë, nën dyshimin se i njëjti kishte kryer veprën penale të lartë-cekur. I njëjti me vendim të prokurorit është dërguar në mbajtje”, thuhet në raportin e Policisë.
Ahmeti kishte mbetur i vdekur pas një shpërthimi me eksploziv, që iu kishte montuar në derën e shtëpisë para tri vite.
Atëkohë familjarët e viktimës kishin deklaruar për media se Ahmeti së fundmi nuk kishte shfaqur asnjë shqetësim për ndonjë problem me ndonjë person.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
