Policia e Tiranës ka zbuluar një call center në bulevardin “Gjergj Fishta”, ku dyshohet se ushtrohej veprimtari e paligjshme e mashtrimit kompjuterik.
Në kuadër të operacionit të koduar “Hold On”, u arrestuan në flagrancë katër persona të dyshuar si organizatorë dhe drejtues të kësaj veprimtarie, ndërsa 49 punonjës të gjetur në ambientet e call center-it u proceduan penalisht në gjendje të lirë.
Sipas Policisë, operacioni u zhvillua nga specialistët e Sektorit për Hetimin e Krimeve Ekonomiko-Financiare, në bashkëpunim me specialistët e Sektorit për Hetimin e Krimeve Kibernetike të DVP Tiranë, nën drejtimin e Prokurorisë.
Të arrestuarit janë shtetasit Ernest Kurti, 28 vjeç, Amanti Jeshili, 21 vjeç, Eljo Dyrmishi, 21 vjeç dhe Marjo Myftari, 19 vjeç, të cilët dyshohet se administronin aktivitetin e paligjshëm ose drejtonin grupet e punonjësve.
Gjatë kontrollit në ambientet e objektit, të përshtatur me dhjetëra poste pune, policia sekuestroi 107 pajisje elektronike, të cilat dyshohet se përdoreshin për kryerjen e mashtrimeve kompjuterike.
Mes tyre janë 94 kompjuterë, 11 telefona celularë dhe 2 iPad, si dhe materiale të tjera me interes për hetimin.
Sipas hetimeve paraprake, ndërhyrja e policisë u bë pas informacioneve të siguruara në rrugë operative se në katin e dytë të objektit zhvillohej aktivitet i paligjshëm në fushën e mashtrimit kompjuterik.
Materialet procedurale i janë referuar Prokurorisë së Tiranës për veprime të mëtejshme hetimore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
