Qeveria maqedonase kërkon ndihmë nga NATO për ekspertizën e zjarrit në spitalin e Tetovës

Qeveria e Maqedonisë së Veriut ka lajmëruar se ekspertizën e zjarrit në spitalin Covid në Tetovë do të bëjnë ekspertë të NATO-s.

Qeveria shpalli tre ditë zie për aksidentin në qendrën spitalore Covid në Tetovë dhe pranoi një ofertë nga vendet aleate për të siguruar ekspertë të huaj për të hetuar shpërthimet dhe zjarret.

Kjo u bë e ditur nga ekzekutivi pas mbledhjes së jashtëzakonshme.

Ajo vendosi të pranojë ofertën e disa aleatëve të NATO -s për të dërguar në vend ekspertë të nivelit më të lartë të ekspertizës në hetimet e zjarreve që të ndihmojnë në përcaktimin e shkaqeve të zjarrit në qendrën modulare Covid në spitalin në Tetovë.

“Në këtë drejtim, Qeveria miratoi një përfundim me një rekomandim që ekipet e ekspertëve të Ministrisë së Brendshme dhe Ministrisë së Shëndetësisë të vihen në dispozicion maksimal të prokurorisë në procedurat hetimore. Qeveria udhëzoi institucionet kompetente që të përcaktojnë se çfarë lloj ndihme dhe mbështetje shtesë nevojitet për familjet e të vdekurve dhe të plagosurve, në mënyrë që ajo të ofrohet në kohën më të shkurtër të mundshme”, thonë nga Qeveria.

Sot, nesër dhe pasnesër është shpallur ditë zie dhe gjatë ditëve të zisë flamuri i Republikës së Maqedonisë Veriore do të ngrihet në gjysmështizë.