Shkon në tre numri i personave të arrestuar në vijim të operacionit të koduar “Çairet”, ku në muajin gusht 2021, u sekuestrua 262 kilogramë lëndë narkotike kanabis dhe u shpallën në kërkim 3 autorët e dyshuar të veprimtarisë kriminale.
Gjatë mbrëmjes së të hënës është vënë në pranga një nga personat e shpallur në kërkim, pas informacioneve të siguruara për vendndodhjen e tij.
Në vijim të këtij operacioni u bë kapja dhe ndalimi i Klajdi Kapllanaj, 21 vjeç, banues në Kaninë, Vlorë, të cilit Gjykata e Rrethit Gjyqësor Vlorë i ka caktuar masën e sigurisë “Arrest në burg”, për veprat penale “Kultivimi i bimëve narkotike”, “Prodhimi dhe shitja e lëndëve narkotike” dhe “Vjedhja e energjisë elektrike”, të kryera në bashkëpunim.
21-vjeçari është shpallur në kërkim në muajin gusht të vitit të kaluar, së bashku me shtetasit F. K., 45 vjeç dhe E. K., 22 vjeç, pasi në vendin e quajtur “Çairet”, në fshatin Kaninë, gjatë kontrollit të ushtruar nga shërbimet e Policisë, në banesën e shtetasit F. K., u gjetën dhe u sekuestruan 210 kg lëndë e dyshuar narkotike kanabis.
Gjithashtu, gjatë kontrollit të ushtruar në një ambient pranë banesës së këtij shtetasi, e përshtatur si serë, me lidhje të jashtëligjshme të energjisë elektrike, policia gjeti fidanë narkotikë të kultivuar në serë dhe në kubikë, si dhe 52 kg lëndë e dyshuar narkotike kanabis, në proces tharjeje.
Gjithashtu, gjatë operacionit, në gusht 2021, u arrestuan në flagrancë A. T., 61 vjeç, me detyrë kryeplak i fshatit Kaninë, për veprën penale “Moskallëzimi i krimit” dhe G. I., 51 vjeç, me detyrë elektricist pranë OSHEE-së, për veprën penale “Shpërdorimi i detyrës”.
Aktualisht vijon puna për kapjen e dy shtetasve të tjerë që janë shpallur në kërkim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
