Pas rreth dy muajsh në arrati, Marjaldo Nela, i shpallur në kërkim për vrasjen e Endri Goxhajt në Memaliaj, është vetëdorëzuar në Policinë e Shtetit.
Pas paraqitjes së tij, ai është ndaluar dhe është vënë në dispozicion të organeve të drejtësisë për vijimin e procedurave hetimore.
Ngjarja për të cilën akuzohet Nela ndodhi mbrëmjen e 21 prillit në qendër të Memaliajt.
Sipas Prokurorisë, konflikti nisi spontanisht mes shtatë personave, të cilët nuk ishin pjesë e grupeve rivale.
Në përplasjen fizike u përfshinë më pas edhe Dali Nela, vjehrri i tij Aldo Kalemi dhe persona të tjerë.
Sipas hetimeve, në kulmin e konfliktit, Endri Goxhaj nxori një armë zjarri dhe qëlloi katër herë në drejtim të Dali Nelës, duke e plagosur.
Prokuroria pretendon se, pasi panë vëllanë e tyre të rrëzuar në tokë, Donaldo dhe Marjaldo Nela nxorën armët dhe qëlluan në drejtim të Goxhajt.
Si pasojë e të shtënave, 30-vjeçari humbi jetën në vend. Sipas hetuesve, pamjet filmike tregojnë se Goxhaj nuk arriti të reagonte me armë në momentin kur u qëllua nga dy vëllezërit.
Pas ngjarjes, Donaldo dhe Marjaldo Nela transportuan me automjet vëllanë e tyre të plagosur drejt Spitalit të Gjirokastrës dhe më pas u larguan, duke u shpallur në kërkim nga policia si autorë të dyshuar të vrasjes.
Në kuadër të këtij hetimi, Gjykata e Gjirokastrës ka caktuar masën e sigurisë "arrest shtëpie"
për Dali Nelën, Aldo Kalemin dhe Ermal Matajn.
Ky i fundit akuzohet për veprën penale "Veprime që pengojnë zbulimin e së vërtetës", pasi dyshohet se ka fshehur armën me të cilën u qëllua ndaj Endri Goxhajt.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
