Një i vdekur e pesë të plagosur nga të shtënat mes dy fiseve në Prishtinë

Një person ka vdekur e pesë të tjerë kanë mbetur të plagosur, pas sulmit me armë mes dy grupeve mbrëmjen e djeshme në Prishtinë.

Policia e Kosovës ka njoftuar se vdekja e viktimës është konstatuar në vendin e ngjarjes nga ekipi mjekësor, derisa të plagosurit po trajtohen në Qendrën Klinike Universitare të Kosovës.

Një mashkull kosovar ka mbetur i vdekur si pasojë e plagëve të pësuara gjatë të shtënave me armë ndërmjet dy grupeve. Vdekjen e viktimës e ka konstatuar ekipi mjekësor në vendin e ngjarjes.

Të shtënat dyshohet se kanë qenë pasojë e konfliktit midis familjeve Sekiraqa dhe Gashi (Capat), në dritën e një incidenti të mëparshëm që përfshinte një të plagosur nga familja Capat disa muaj më parë.

I vrarë ka mbetur Premtin Gashi nga grupi i Capave, i cili ishte anëtar me shumë ndikim brenda grupit, dhe s’kishte shumë kohë që ishte liruar nga burgu.

Policia e Kosovës ka aktivizuar Unazën e Çeliktë, duke shtuar pikat e kontrollit në lokacione të ndryshme.

Në vendin e ngjarjes ka dalë edhe prokurori dhe zyrtarët e Institutit e Mjekësisë Ligjore (IML) që e kanë tërhequr trupin për obduksion.

Sulmi ka ndodhur rreth orës 22:00, në rrugën “Gazmend Zajmi”, në lagjen Aktash në Prishtinë.