Policia e Tiranës, në bashkëpunim me Prokurorinë, ka finalizuar operacionin e koduar "Illegal Trade", në kuadër të të cilit janë kontrolluar tetë subjekte tregtare që ushtronin aktivitet në fushën e shitjes së produkteve të markave luksoze.
Gjatë kontrolleve u konstatua se në këto subjekte tregtoheshin pajisje elektronike, veshje dhe aksesorë të markave të njohura, të dyshuara si mallra të kontrabanduara, pa dokumentacion që provonte origjinën dhe zhdoganimin e tyre.
Si rezultat i operacionit u sekuestruan 16 telefona celularë, 10 njësi kompjuterike, një laptop, si dhe 11 çanta dhe veshje të markave luksoze.
Verifikimet zbuluan gjithashtu se administratorët e subjekteve nuk deklaronin të ardhurat nga shitjet pranë organeve tatimore. Në një prej bizneseve u konstatua edhe tregtim i produkteve pa lëshimin e kuponit tatimor, çka solli pezullimin e aktivitetit të këtij subjekti.
Në përfundim të veprimeve procedurale nisi procedimi penal ndaj nëntë administratorëve ose përfaqësuesve të subjekteve: Gj. H., N. R., S. S., A. D., B. D., A. L., A. L., K. Gj. dhe J. B.
Materialet procedurale i janë referuar Prokurorisë për veprime të mëtejshme, ndërsa hetimet vijojnë për dokumentimin e plotë të shkeljeve të konstatuara.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
