Fier, zjarr me përmasa të mëdha në zonën e Peshtanit

Një zjarr me përmasa të mëdha ka rënë në orët e para të pasdites së sotme në zonën e Peshtanit në Fier.

Zjarri ka djegur një sipërfaqe të konsiderueshme me bimësi të dendur në pyllin me pisha dhe ullishte.

Ndërkohë zjarri është ndikuar edhe nga era e fortë ndërsa terreni kodrinor vështirëson shuarjen e flakëve.

Me marrjen e njoftimit nga banoret e kësaj zone kanë shkuar në vendngjarje dy mjetet zjarrfikëse të cilët po punojnë për shuarjen e flakëve, të ndihmuar edhe nga banorët e zonës.

Zjarri i sotëm ndodhet pranë kodrave të Likovunit, aty ku janë vendosur antenat televizive dhe të telefonisë celulare.

Njoftimi i policisë

Rreth orës 14:35, në tokën ne pronësi të shtetases E. M., 40 vjeçe,  në fshatin Peshtanbregas, Fier, ka rënë zjarr.

Si pasojë e përhapjes së flakëve nga era, ka marrë flakë dhe një sipërfaqe me ullinj që ndodhej pranë kësaj toke.

Shërbimet e Policisë dhe zjarrfikëses ndodhen në vendngjarje për të fikur zjarrin.

Në komisariatin e Policisë Fier është shoqëruar shtetasja E. M., dhe bashkëshorti i saj, shtetasi J. M., për sqarimin e rrethanave të rënies së zjarrit.