Zjarri që shpërtheu më 11 Gusht në drejtim të Parkut Natyror të Gërmenjës, në territorin e bashkisë Kolonjë, mbetet ende aktiv, edhe pse gjatë natës nuk ka pësuar përhapje të mëtejshme.
Megjithatë siç raporton korrespodent e MCN nga Korça, rreziku për përhapje të mëtejshme është i pranishëm, pasi era favorizon vazhdimin e flakëve.
Në terren janë angazhuar rreth 40 forca zjarrfikëse dhe ushtarake, të cilët po punojnë për të mbajtur zjarri nën kontroll dhe për të parandaluar depërtimin e tij në kurorën e zonës së mbrojtur të parkut.
Shërbimi i Bashkisë Kolonjë ka nisur operacionin e hapjes së rrugëve për të mundësuar qasjen e mjeteve zjarrfikëse, por prania e minave në këtë zonë kufitare po e bën situatën shumë të rrezikshme.
Shpërthimet e herëpashershme nga minat kanë kufizuar mundësinë e ndërhyrjes afër perimetrit të zjarrit, duke shtuar rrezikun për ekipet që janë në terren.
Një grup xhenjos i dërguar nga Tirana është mbërritur mbrëmë dhe ka nisur operacionet për demontimin e minave të konstatuara në këtë territor.
Autoritetet shqiptare janë në komunikim të vazhdueshëm me autoritetet greke për të koordinuar veprimet dhe për të minimizuar rrezikun e mëtejshëm në këtë zonë të ndjeshme natyrore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
