Komisioni i Pavarur i Kualifikimit njoftoi sot se pas shqyrtimit të dokumentacionit dhe zhvillimit të seancës dëgjimore në datën 15 maj për subjektin e rivlerësimit, Majlinda Andrea, ish-gjyqtare në Gjykatën e Lartë, vendosi shkarkimin e saj nga detyra.
Majlinda Andrea, ish-gjyqtarja e Gjykatës së Lartë e dënuar me shërbim prove për korrupsion, nuk u paraqit të hënën më 15 maj në seancën dëgjimore në Komisionin e Pavarur të Kualifikimit, KPK lidhur me procesin e saj të vetingut, ndërkohë që relatimi ekspozoi mosushtrimin e kompetencave nga këshillat dhe institucionet kompetentë lidhur me statusin e saj.
Për rrjedhojë, Andrea vijon të gëzojë statusit e magjistratit edhe gjashtë vjet pasi është dënuar për korrupsion.
Vendimi, i arsyetuar me shkrim, nga trupi gjykues i kryesuar nga Olsi Komici, Alma Faskaj relatore, Firdes Shuli anëtare do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve.
Majlinda Andrea e ka nisur karrierën në sistemin e drejtësisë në vitin 1992 dhe ka punuar fillimisht si gjyqtare në Gjykatën e Durrësit. Në vitin 2008, Andrea u emërua anëtare e Gjykatës së Lartë dhe e ushtroi detyrën deri në vitin 2016, kur u përball me akuzat për mitmarrje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
