Policia e Kosovës ka gjetur armatim në hotelin “Rajska Banja” në Banjskë të Zveçanit, e i cili dyshohet se ka qenë aty që nga sulmi në këtë fshat nga grupi kriminal i serbëve ndaj Policisë së Kosovës në shtator të vitit të kaluar.
Policia një ditë më parë ka njoftuar për aksionin, e ndërsa të shtunën ka thënë se armatimi u gjet në banjo. Nga aty ka konfiskuar një AK-47, karikatorë, fishekë, kapelë, bluza dhe pantallona ushtarakë, thikë, antiplumb e pajisje të tjera.
Njësiti i hetuesisë gjatë kontrollit në banjon e një hoteli ka gjetur dhe konfiskuar: një AK-47, katër karikatorë, 103 fishekë kalibrash të ndryshëm, kapelë, bluza dhe pantallona ushtarakë, një thikë, shallë ushtarake, antiplumb me pajisje tjera. Rasti duke u hetuar.
Kompleksi “Rajska Banja” u mor në administrim nga shteti në fund të vitit të shkuar.
Kompleksi ishte funksional deri në marrjen e tij nga Agjencia Kosovare e Privatizimit.
Më 24 shtator të vitit të kaluar, dhjetëra serbë të armatosur patën sulmuar Policinë e Kosovës në Banjskë duke vrarë policin Afrim Bunjaku.
Në aksionin pasues të Policisë ishin vrarë edhe tre sulmues serbë. Përgjegjësinë për sulmin terrorist e pati marrë ish-nënkryetari i Listës Serbe, Millan Radoiçiç, që besohet se është në Serbi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
