Një ngjarje e mundshme kriminale mes fqinjësh është parandaluar nga Policia në Sarandë.
Pas një njoftimi nga një shtetase, e cila informonte se fqinji i saj kishte hyrë i armatosur në banesë dhe i kishte kanosur atë dhe familjarët, shërbimet e Komisariatit të Policisë Sarandë reaguan menjëherë dhe shkuan në vendngjarje për neutralizimin e autorit.
Si rezultat i ndërhyrjes së shpejtë të policisë, u arrestua shtetasi Shefki Kaçupaj, 62 vjeç. Gjatë kontrollit, policia sekuestroi armën e zjarrit, një pistoletë me mulli, e cila dyshohet se është përdorur për kanosjen e fqinjëve.
Nga hetimet paraprake dyshohet se 62-vjeçari i kishte kanosur fqinjët me armë zjarri për shkak të një konflikti të vazhdueshëm mes tyre për shfrytëzimin e një pjese të përbashkët të pallatit, konkretisht tarracës.
Materialet procedurale i janë referuar Prokurorisë së Sarandës për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
