Ambasadori i Delegacionit të Bashkimit Europian, Luigi Soreca, vizitoi sot pasdite Këshillin e Lartë të Prokurorisë dhe zhvilloi një takim me Kryetarin e Këshillit, Gent Ibrahimi.
Në kuadër të reformës së fundit legjislative, e cila ka për synim forcimin e eficiencës në sistemin e drejtësisë, Soreca dhe Ibrahimi diskutuan lidhur me ecurinë e deritanishme të Reformës në Drejtësi, konsolidimin e Këshillit si institucion i qeverisjes të sistemit të prokurorisë, rezultatet e para lidhur me forcimin e pavarësisë dhe të integritetit të prokurorëve si dhe rezultatet e para inkurajuese të sistemit të prokurorisë në luftën kundër krimit.
Soreca e ka uruar Ibrahimin për punën e bërë deri më sot nga KLP-ja. Ai ka theksuar se BE-ja do të vazhdojë të mbështesë punën e kryer nga ky organ i drejtësisë.
“Vijojnë sfidat për të mbështetur progresin e bërë në funksion të fazës së re të reformës së drejtësisë. Thelbësore për të ruajtur pavarësinë dhe integritetin e sistemit të Prokurorisë. Bashkimi Evropian vijon mbështetjen për punën e KLP-së”, shkruan ambasadori.
Ata diskutuan gjithashtu lidhur me formatimin e asistencës së ardhshme të Bashkimit Europian në ndihmë të sistemit shqiptar të drejtësisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
