Komisioni i Pavarur i Kualifikimit konfirmoi sot në detyrë gjyqtaret Nafije Hasko dhe Ersida Bajgora, si edhe prokurorin Pali Deçolli.
KPK paraqiti raporte pozitive për pasurinë dhe pastërtinë e figurës, si dhe nuk u evidentoi probleme domethënëse në kriterin professional për të tre magjistranët.
Ersida Bajgora përfundoi studimet në Shkollën e Magjistraturës në vitin 2016 dhe pasi kreu stazhin profesional në Gjykatën e Tiranës, u emërua si gjyqtare pranë Gjykatës së Rrethit Gjyqësor Lushnjë, ku dhe e ushtron aktualisht funksionin.
Nafije Hasko përfundoi studimet e Shkollës së Magjistraturës në vitin 2002 dhe punoi për gati një dekadë si gjyqtare në Gjykatën e Rrethit gjyqësor Fier. Prej vitit 2013, ajo e ushtron funksionin e gjyqtares pranë Gjykatës Administrative të Tiranës.
Pali Deçolli e ka nisur karrierën në sistemin e drejtësisë si oficer i policisë gjyqësore. Ai u emërua prokuror në vitin 2012 dhe e ka ushtruar funksionin për gati një dekadë si prokuror i Prokurorisë së Rrethit Durrës. Ai ka qenë gjithashtu si drejtues i komanduar i Prokurorisë së Rrethit Fier.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
