Marinari italian tenton të kalojë pakon me drogë në portin e Durrësit, arrestohet

Një marinar italian është vënë në prangat e policisë, pasi tentoi të kalojë në portin e Durrësit një pako me drogë.

Në kuadër të operacionit të koduar “Next” u bë arrestimi në flagrancë, për veprën penale “Trafikim i lëndëve narkotike”, i shtetasit italian S. M., 25 vjeç, banues në Itali, i punësuar me detyrë marinar në një traget Durrës- Ankona.

I riu u kap në flagrancë në ambientet e terminalit të pasagjerëve të portit Durrës, në dalje të Republikës së Shqipërisë.

Pas kontrollit fizik të ushtruar ndaj tij, bazuar në informacionet e siguruara më parë, shërbimet e policisë i gjetën dhe sekuestruan në cilësinë e provës materiale një pako brenda së cilës kishte lëndë narkotike në formë boçeje, të dyshuar kanabis.

Ndaj të dyshuarit hetimet janë në vijim, ndërkohë që materialet iu referuan Prokurorisë Durrës, për veprën penale “Trafikim i lëndëve narkotike”.