Bie nga lartësia e magazinës ku punonte, humb jetën emigranti shqiptar në Itali

Një emigrant shqiptar ka humbur jetën në mënyrë tragjike mëngjesin e së hënës në Bareggio, në zonën e Milanos, në Itali.

Nga të dhënat e mësuara deri më tani, bëhet e ditur se ngjarja ka ndodhur në një magazinë në Via Gran Sesso.

Për arsye që janë ende nën hetim, ka humbur jetën një punëtor 53-vjeçar, shtetas shqiptar, pasi ka rënë nga një lartësi prej rreth shtatë metrash.

Me gjithë ndërhyrjen e menjëhershme të një ambulance dhe bluzave të bardha, shqiptari u deklarua i vdekur.

Lidhur me këtë ngjarje hetimet janë në vijim për rindërtimin e shkaqeve dhe dinamikës së aksidentit.