Një ngjarje e rëndë është regjistruar në Lushnjë, ku një automjet është djegur qëllimisht pranë banesës së pronarit në fshatin Pluk. Policia ka identifikuar dhe vënë në pranga autorin e dyshuar, ndërsa vijon puna për kapjen e personit që dyshohet se e porositi krimin.
Sipas burimeve zyrtare, pas kallëzimit të shtetasit D. V. për djegien e automjetit të tij, shërbimet e Komisariatit të Policisë Lushnjë ndërhynë menjëherë, duke organizuar veprimet hetimore për zbardhjen e plotë të ngjarjes.
Si rezultat i hetimeve, u bë i mundur identifikimi dhe arrestimi i shtetasit Mario Biti, 39 vjeç, banues në fshatin Pluk, i cili dyshohet se ka kryer djegien e automjetit.
Po ashtu, u identifikua edhe shtetasi Andi Zaimi, 28 vjeç, si porositësi i dyshuar i krimit. Nga hetimet paraprake rezulton se ai kishte konflikte për motive pronësie me xhaxhanë e pronarit të automjetit të djegur.
Policia bën me dije se vijon puna intensive për kapjen e 28-vjeçarit, ndërsa materialet procedurale i janë referuar Prokurorisë së Fierit për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
