Shqipëri-Mbretëri e Bashkuar kryejnë stërvitje të përbashkët në fushën e mbrojtjes

Mbretëria e Bashkuar dhe Shqipëria kanë një kulturë të fortë bashkëpunimi dhe partneriteti në fushën e mbrojtjes.

Këtë vit, gjatë një periudhe 1-mujore, regjimenti shqiptar i operacioneve speciale dhe trupat e Brigadës së Operacioneve Speciale, të Mbretërisë së Bashkuar u stërvitën së bashku gjatë stërvitjes së pestë “Strong Eagle”.

Përmes një njoftimi për media të Ambasadës britanike, qëllimi i stërvitjes ishte që pjesëtarët e regjimenteve të mësonin nga njëri-tjetri, të forconin marrëdhëniet ekzistuese profesionale dhe personale dhe të punonin drejt zhvillimit të aftësive të Forcave Speciale shqiptare.

Ambasada thotë se kjo marrëdhënie mes dy njësive ka qenë e vazhdueshme për tre vitet e fundit dhe ka shënuar shumë suksese.

Së fundmi, falë trajnimi të përbashkët, një ekip nga regjimenti i operacioneve speciale shqiptare fitoi një medalje argjendi shumë të merituar në konkursin vjetor “Cambrian Patrol” në Uells.