Gjykata e shkallës së parë në Vlorë ka caktuar masën e sigurisë "arrest me burg" për 51-vjeçarin Petrit Ndoji i arrestuar ditën e martë në mbrëmje si rjedhojë e operacionit "knock out 3".
Ky shtetas u kap nga shërbimet e polcisë pasi nga qyteti i Lezhës në Vlorë udhëtonte me 4 mina me telekomandë gati për shitje. Mina të cilat do të shiteshin në Vlorë për shifrën e 10 mijë eurove.
Avokati mbrojtës ka kërkuar masë më të lehtë sigurie "arrest shtëpie" nën pretendimin se 51 vjeçari ka kryer vetëm transportin e minave dhe nuk ka patur për qëllim ti shiste ato, ndërsa prokurori Anton Pali ka kërkuar "arrest me burg".
Drejtuesja e kësaj seance, Lirza Sinollari ka pranuar kërkesën e prokurorisë, e cila ka paraqitur prova të pakundërshtueshme të arrestimit të 51- vjeçarit në flagrancë, në momentin që ky i fundit do të futej në qytet për të shitur minat.
Sipas gjyqtares së çështjes, hetimi është bazuar edhe në përgjigje telefonike dhe dëshmi të cilat tregojnë se 51 vjeçari i ka montuar minat, ka krijuar edhe lidhjet për ti shitur ato në Vlorë, duke i transportuar vetë këto të fundit.
Petrit Ndoji u arrestua të martën në mbrëmje në rrugën "Gjergj Araniti" teksa policia në lidhje me këtë ngjarje vijon hetimet për të zbuluar porositësit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
