Teksa media raporton me dhjetëra raste të titujve e punimeve shkencore të bazuara në kopje. Emisioni “FactCheck” në MCN TV zbardh vendimin çka tregon se Universiteti i Tiranës është në alarm. Të gjithë titujt shkencorë nga studentët tek doktorantët do të kalojnë në filtrin e teknologjisë përpara certifikimit.
Prej vitesh në media publikohen raste dhe skandale të plagjiaturës, nga figura publike e deri tek zyrtarë e politikanë në punimet e tyre shkencore dhe doktoraturë.
E teksa skandali më i fundit zbuloi Universitetin ilegal të Zall Bastarit, Universiteti i Tiranës ka nisur kontrollin e të gjitha doktoraturave nëpërmjet sistemit të software-it Turnitin.
Nga dokumentet e siguruara nga emisioni FactCheck rezulton se tashmë ky vendim është aktiv dhe në filtër do të kalojnë:
Të gjitha punimet akademike dhe shkencore, duke përfshirë punimet e studentëve të ciklit të dytë dhe të tretë, artikujt shkencorë të stafit akademik, si dhe publikimet në revista apo konferenca. Çdo material i tillë duhet t’i nënshtrohet kontrollit antiplagjiaturë përpara vlerësimit apo publikimit, si pjesë e detyrueshme e procedurave akademike.
Kontrolli do të realizohet përmes sistemit të licencuar Turnitin, i cili gjeneron raporte mbi nivelin e ngjashmërisë së tekstit me burime të tjera. Megjithatë, universiteti thekson se përqindja e ngjashmërisë nuk përbën automatikisht provë plagjiature, por shërben si një mjet ndihmës që kombinohet me analizën cilësore nga strukturat akademike.
Procesi i verifikimit parashikon disa nivele kontrolli, duke nisur nga shqyrtimi paraprak në njësitë bazë, ngritja e komisioneve ad-hoc dhe deri te vendimmarrja përfundimtare nga Këshilli i Etikës dhe Rektori. Gjatë këtij procesi merren në konsideratë natyra e ngjashmërisë, konteksti shkencor dhe qëllimshmëria e autorit, duke garantuar një proces të drejtë dhe transparent.
Rregullorja parashikon gjithashtu klasifikimin e shkeljeve sipas nivelit të ngjashmërisë, nga raste pa shkelje deri te plagjiatura e rëndë, duke përcaktuar edhe masa disiplinore përkatëse, që variojnë nga korrigjimi i punimit deri te përjashtimi nga universiteti apo masa ndaj stafit akademik.
Nevoja për këtë ndërhyrje lidhet me rritjen e kërkesave për cilësi në arsimin e lartë dhe kërkimin shkencor, si dhe me domosdoshmërinë për të parandaluar praktikat e pandershme akademike. Universiteti synon jo vetëm ndëshkimin e shkeljeve, por edhe edukimin e studentëve dhe stafit për respektimin e etikës dhe standardeve të kërkimit shkencor në një mjedis gjithnjë e më konkurrues.
Po çfarë është Turnitin?
Është një platformë ndërkombëtare software që përdoret gjerësisht nga universitete dhe institucione arsimore për të kontrolluar ngjashmërinë e teksteve dhe për të identifikuar rastet e mundshme të plagjiaturës. Ajo funksionon duke krahasuar dokumentet e dorëzuara me një bazë të dhënash shumë të gjerë, që përfshin publikime shkencore, libra, faqe interneti dhe punime të tjera studentore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
