Vuri në rrezik jetën e policëve në Manzë, kapet i shpalluri në kërkim

Policia e Durrësit vijon operacionin e koduar “Late hours”, gjatë të cilit u vu në pranga një person i shpallur në kërkim. Shërbimet e stacionit të policisë Manzë, si rezultat i kontrolleve në terren, për kapjen e shtetasve të shpallur në kërkim, bazuar dhe në informacionet e siguruara nga inteligjenca policore, kanë kapur dhe ndaluar shtetasin Azem Allçi, 32 vjeç, banues në Manzë, Durrës, i cili ishte shpallur në kërkim në kuadër të operacionit policor të koduar “Late hours”. Në muajin shkurt, shërbimet e policisë kanë lokalizuar një automjet dhe i kanë dhënë shenjë për ndalim, por drejtuesi i automjetit, shtetasi Azem Allçi, sapo ka parë shërbimet e policisë, nuk i është bindur urdhrit për të ndaluar, por ka shtuar shpejtësinë, duke rrezikuar jetën e punonjësve të Policisë. Shërbimet e policisë janë vënë në ndjekje të automjetit dhe kanë bërë të mundur kapjen dhe arrestimin në flagrancë të shtetasit O. V., 19 vjeç (pasagjer), ndërsa shtetasi Azem Allçi ka mundur të largohet duke përfituar nga errësira. Gjatë kontrollit në automjet, shërbimet e policisë gjetën dhe sekuestruan në cilësinë e provës materiale një armë zjarri pistoletë dhe municion luftarak. Materialet i kaluan Prokurorisë, për veprime të mëtejshme.