Vrasja e Liridona Murselit/ Bashkëshorti pranoi se ka porositur ekzekutimin, arrestohet edhe i dyshuari i tretë

Ngjarja si një triller filmash, me protagonistë jo skenaristë dhe aktorë, u zhvillua mbrëmjen e së mërkurës në Prishtinë.

 30-vjeçarja u qëllua për vdekje brenda makinës nga ajo që bashkëshorti i saj, Naim Murseli, tha se ishte grabitje.

Naim Murseli, Granit Plava dhe Kushtrim Kokalla, janë arrestuar mbrëmë si të dyshuar për vrasjen e Liridona Ademajt, raportojnë mediat në Kosovë.

Liridona Murseli e cila fillimisht tha se u vra për ta grabitur në sytë e dy fëmijëve të saj dhe të bashkëshortin, në fakt kishte një tjetër prapavijë dhe porositësi i krimit ishte hiç më pak se bashkëshorti, me të cilin kishte ndarë jetën vitet e fundit dhe kishte sjellë në këtë botë dy fëmijë.

Murseli i cili është bashkëshorti i të ndjerës dyshohet se kishte porositur vrasjen, që ishte ekzekutuar nga Plava, në këmbim të shumës prej 30 mijë eurosh.

Plava, ashtu sikurse Murseli, e ka pranuar fajësinë para hetuesve, ndërsa ende nuk dihen detaje rreth dëshmisë së dhënë se pse bashkëshorti porositi vrasjen e gruas dhe e inskenoi atë si grabitje.

I arrestuari i tretë, është Kushtrim Kokalla. Ky i fundit dyshohet se është pjesëtar i Forcës së Sigurisë së Kosovës, i cili sipas mediave vendase është nipi i Murselit.

Prokuroria Themelore në Prishtinë tha se është sekuestruar edhe arma me të cilën dyshohet se është kryer vepra, duke shtuar se të dyshuarit janë duke u intervistuar në stacionin policor, derisa ndaj të njëjtëve do të ndërmarrë veprimet e mëtejshme ligjore.

Deri më tani nuk dihen shkaqet e kryerjes së këtij krimi që tronditi opinionin publik.

Naimi dhe Liridona kishin 12 vite të martuar.