Sherr mes tre të afërmve në Tepelenë, përfundojnë në spital pas dhunës me mjete të forta

Tre persona janë përfshirë në një konflikt fizik pas mesnatës në Tepelenë, pranë Kalasë së Ali Pashës, në ambientet e një bar-llotoje.

Sipas informacioneve paraprake, në sherr janë përfshirë tre persona të moshave 36, 44 dhe 45 vjeç. Dy prej tyre janë vëllezër, ndërsa i treti është kushëri i tyre. 

Dyshohet se konflikti ka ndodhur nën ndikimin e alkoolit, ndërsa shkaqet mbeten ende të paqarta.

Përplasja ka degraduar në përdorimin e mjeteve të forta, si leva dhe sende metalike, duke shkaktuar lëndime te të tre personat.

Të përfshirët kanë marrë ndihmë mjekësore në Spitalin e Tepelenës. Deri më tani nuk është bërë asnjë kallëzim në polici lidhur me ngjarjen, ndërsa pritet që rrethanat dhe shkaqet e konfliktit të sqarohen.