“Sill vajzën ose do ju vras”/ Si përndiqej dhe kërcënohej 18-vjeçarja gjatë karantinës

Gjykata e Tiranës ka dënuar me një vit burg shtetasi E.K., i akuzuar për përndjekjen e një 18-vjeçareje. Në vendimin e Gjykatës të siguruar nga TvT, thuhet se ngjarja në fjalë ka ndodhur gjatë muajit prill, kohë kur vendi ndodhej në karantinë për shkak të pandemisë.

Në këtë periudhë, në Komisariatin e Policisë Nr.6. në Tiranë është paraqitur dhe ka bërë kallëzim shtetasja L. S., e cila ka kallëzuar se: Prej pesë muajsh ka qënë e lidhur me shtetasin E. K. Më datë 10.04.2010, kur ajo ka dalë nga banesa për të rregulluar telefonin, ka takuar këtë të fundit, i cili e ka pyetur “se përse nuk i'a hapte telefonin”. Më pas, ata kanë shkuar në shtëpinë e tij për të marrë një aparat tjetër celular, sepse ai ka pretenduar se nuk mund të rrinte pa folur me të.

Rreth orës 17:00 ai ka shkuar në banesën e 18-vjeçares dhe i ka dalë babai i saj, të cilit i ka thënë  “sill vajzën ose do ju vras”. Babai i saj, i ka thënë atij të rrinte larg tyre. Më datë 11.04.2010, rreth orës 09:00 shtetasi E.K., është futur në banesë pa dijeninë e vajzës dhe i ka kërkuar të dilnin për të folur së bashku. Ndërkohë, ai ka pasur një thikë në dorë dhe e ka kërcënuar, se do të vriste veten para saj.

Më pas, ka ardhur gjyshja e saj dhe ai ka dalë jashtë, por është futur sërish brenda, e ka tërhequr L., prej krahu, me qëllim ta nxirrte jashtë. L. S., ka shtuar se nuk do të ketë me lidhje me të, por ai e kërcënon me jetë.

Shtetasi E. K., i cili ka spjeguar se ka qenë i lidhur me kallzuesen prej shtatë muajsh dhe kanë menduar të fejohen, por babai i saj nuk ka qënë dakord. Ai ka spjeguar se shpesh L., shkonte në shtëpinë e tij, por më datë 10.04.2020, ai e ka marrë në telefon dhe ajo nuk i është përgjigjur. Pas disa thirrjeve, nga telefoni i saj i është përgjigjur një burrë, i cili e ka fyer dhe ofenduar E. Më pas, ai ka shkuar në banesën e L., për t’u  sqaruar. Ai pretendon se ata nuk kanë debatuar apo të jenë konfliktuar, por në një moment L., ka lajmëruar të atin, duke i thënë se Erjoni kishte ardhur sërish në banesë dhe më pas është njoftuar policia.