Pas ekzekutimit të 29-vjeçarit E. D., ngjarje e ndodhur në orët e para të 20 majit në lagjen nr. 18 të Durrësit, policia ka bërë një tjetër zbulim të rëndësishëm në vijim të hetimeve.
Shërbimet e Policisë së Durrësit, në bashkëpunim me ato të Tiranës, kanë lokalizuar dhe gjetur një automjet të djegur në fshatin Gërdec, i dyshuar se është përdorur nga autorët e krimit.
Automjeti i gjetur është i markës ‘Seat’, dhe pavarësisht se është shkrumbuar pothuajse plotësisht, në sediljen e pasme të tij është zbuluar një armë zjarri tip kallashnikov.
“Në vijim të kontrolleve dhe veprimeve hetimore që po kryhen nga grupi i posaçëm, me qëllim zbardhjen e plotë të rrethanave të ngjarjes së ndodhur më 20.05.2025, shërbimet e Policisë kanë identifikuar mjetin e djegur në Gërdec dhe armën që dyshohet se është përdorur në vrasje”, thuhet në njoftimin zyrtar të Policisë.
Grupi hetimor në drejtimin e Prokurorisë, po punon intensivisht për të siguruar çdo provë materiale dhe biologjike që mund të ndihmojë në identifikimin dhe kapjen e autorëve të dyshuar të kësaj ngjarjeje kriminale.
Ngjarja mbetet ende e pazbardhur në tërësi, ndërsa hetimet janë në fazë aktive.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
