Një operacion kundër kultivimit të lëndëve narkotike është zhvilluar në zonën e Krujës, ku policia ka zbuluar dhe asgjësuar rreth 5 mijë rrënjë kanabis të kultivuara në afro 100 parcela të ndryshme.
Sipas njoftimit zyrtar, aksioni i përbashkët i Policisë së Tiranës dhe Krujës është përqendruar kryesisht në zonat malore të Krujës, ku bimët narkotike janë gjetur të mbjella në parcela që përmbanin nga 50 deri në 100 rrënjë secila.
Deri në këtë fazë të operacionit nuk është arrestuar asnjë person, por uniformat blu bëjnë me dije se janë identifikuar disa persona që dyshohet se posedonin dhe administronin parcelat me kanabis. Ata janë shpallur në kërkim.
Në operacion janë angazhuar 15 grupe efektivësh policie, ndërsa kontrollet në terren dhe aksioni për goditjen e kultivimit të bimëve narkotike do të vijojnë edhe në ditët në vijim.
Policia thekson se puna për identifikimin dhe vënien para përgjegjësisë ligjore të personave të përfshirë në këtë aktivitet të paligjshëm vazhdon.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
