I burgosuri rumun ndërron jetë në burgun e Shkodrës

Një i burgosur rumun ka ndërruar jetën, ndërsa ndodhej në burgun e Shkodrës, i akuzuar për vjedhje me dhunë dhe drogë.

Drejtoria e Përgjithshme e Burgjeve informon se ditwn e sotme në IEVP Shkodër, ka ndërruar jetë shtetasi Nicolae Ionnut Erion Deliver, 21 vjeç, lindur në Rumani dhe banues në Shkodër.

I riu ishte arrestuar më datë 7 tetor 2024 dhe ishte akomoduar në IEVP Shkodër më datë 10 tetor 2024, me masë sigurimi “Arrest në burg”, për veprat penale “Vjedhje me dhunë” dhe “Prodhim dhe shitje e narkotikëve”.

21-vjeçari është konstatuar nga personeli i shërbimit duke qëndruar në shtrat, ç’ka ka sjellë njoftimin e menjëhershëm të personelit shëndetësor të institucionit. 

Pas vlerësimit mjekësor, janë konstatuar parametra jetësorë të ulët dhe i është dhënë ndihma e parë mjekësore, me rekomandim për dërgim të menjëhershëm në urgjencën e spitalit rajonal.

Menjëherë është nisur me urgjencë drejt Spitalit të Koplikut, si struktura më e afërt shëndetësore. Gjatë transportimit i është dhënë ndihma mjekësore nga stafi shëndetësor. Në urgjencën e Spitalit të Koplikut i është dhënë ndihma mjekësore e menjëhershme, por më pas mjeku i urgjencës ka konstatuar se shtetasi ka ndërruar jetë.

Institucioni ka njoftuar menjëherë organet kompetente dhe po bashkëpunon plotësisht për sqarimin e plotë të rrethanave të ngjarjes, në përputhje me procedurat ligjore në fuqi.