Prokuroria e Tiranës ka mbyllur hetimet dhe ka dërguar për gjykim Vladimir Kola dhe katër të pandehur të tjerë të dyshuar për vrasjen e Briken Sanaj te “Kodra e Diellit” në Tiranë.
Prokuroria pranë Gjykatës së Shkallës së Parë të Juridiksionit të Përgjithshëm, Tiranë, përfundoi hetimet dhe dërgon në gjyq për “Vrasje me paramendim” dhe “Mbajtja pa leje dhe prodhimi i armëve” shtetasin Vladimir Kola për vrasjen e shtetasit Briken Sanaj në kompleksin “Kodra e Diellit” më 30 tetor 2022.
Po kështu, Prokuroria e Tiranës dërgon në gjyq dhe katër shtetasit e tjerë, Gj.K., K.A., E.H., dhe Z.K., për veprën penale “Moskallëzim krimi” dhe “Përkrahje të autorit të krimit”.
Nga hetimet e procedimit penal nr.7911, 2024 nga Prokuroria pranë Gjykatës së Shkallës së Parë të Juridiksionit të Përgjithshëm, Tiranë, rezultoi se vëllai i viktimës në vitin 2012 është konfliktuar me vëllezërit e autorit, pasi i kanë ngacmuar të fejuarën.
Në përfundim të hetimeve mbi ngjarjen e tetorit 2022 ku shtetasi Briken Sanaj u qëllua me armë zjarri, këqyrjes së kamerave, vendit të ngjarjes dhe administrimit të akt-ekspertimeve, Prokuroria pranë Gjykatës së Shkallës së Parë të Juridiksionit të Përgjithshëm, Tiranë, arriti në konkluzionin se i pandehuri Vladimir Kola, ka udhëtuar nga Barcelona në drejtim të Aeroportit të Podgoricës dhe ka hyrë në Shqipëri në mënyrë të paligjshme pa u regjistruar në pikën e kontrollit.
Pas kësaj ai ka blerë një automjet duke përdorur targat e një mjeti tjetër, i cili pas vrasjes së shtetasit Briken Sanaj është gjetur i djegur në fshatin Domje.
Brenda tij është gjetur arma e krimit, ndërsa autori ka kaluar sërish në Mal të Zi në mënyrë të paligjshme.
Sa më sipër, prokuroria kërkon dërgimin në gjyq për të pestë të pandehurit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
