Lezha u përball me një situatë të vështirë nga zjarret gjatë mbrëmjes së të enjtes, me disa vatra që u aktivizuan në zona të ndryshme.
Sic bëri të ditur për “MCN live” korrespodenti Juli Simoni, era e fortë favorizoi përhapjen e flakëve, duke e bërë ndërhyrjen e zjarrfikësve më të vështirë dhe duke rrezikuar edhe banesat pranë zonave të përfshira nga zjarri.
Situata më problematike sipas tij, u shënua në Barbullojë, ku flakët përfshinë shkurre dhe ferra në një sipërfaqe të konsiderueshme.
Për shkak të erës, zjarri në Barbullojë, u përhap me shpejtësi në drejtim të banesave, duke krijuar panik te banorët e zonës.
Për shuarjen e flakëve u angazhuan zjarrfikësit e Lezhës, ndërsa në ndihmë mbërritën edhe forca nga bashkitë fqinje. Ekipet punuan për disa orë në terren, duke ndërhyrë në disa pika për të ndaluar avancimin e flakëve drejt banesave.
Pas një operacioni të gjatë, zjarri në Barbullojë u vu nën kontroll, ndërsa ndërhyrja e forcave zjarrfikëse bëri të mundur shmangien e përhapjes së flakëve në zonën e banuar.
Por ndërsa situata në Barbullojë po vihej nën kontroll, rreth orës 22:00 një tjetër vatër zjarri u shfaq në malin e Manatisë, pranë aksit të vjetër Lezhë-Milot.
Flakët përfshinë masivin pyjor dhe, të favorizuara sërish nga era e fortë, nisën të përhapen në drejtim të zonave të banuara.
Për shkak të terrenit dhe intensitetit të zjarrit, ndërhyrja gjatë natës ishte e vështirë.
Në orët e para të mëngjesit, operacioni për shuarjen e flakëve vijoi edhe nga ajri, ndërsa në terren u angazhuan forcat zjarrfikëse për të izoluar vatrat dhe për të parandaluar përhapjen e mëtejshme të zjarrit.
Dyshohet se shkak i zjarreve është bërë pakujdesia gjatë djegies së mbetjeve të tokave bujqësore, ndersa autoritetet vijojnë monitorimin e zonave të prekura për të shmangur riaktivizimin e vatrave të zjarrit.
Policia ka nisur hetimet në këtë rast, pasi dyshohet se zjarri është ndezur nga banorët për interesat e tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
