“Grabitja” e karburantit në Durrës/ Arrestohet menaxheri, simuloi ngjarjen pasi i la lekët e xhiros në kumar

Policia ka zbardhur ngjarjen e raportuar si vjedhje me dhunë, që ndodhi dje në një karburant në autostradën Tiranë- Durrës.

 Në pranga ka përfunduar menaxheri i firmës, Gerti Farruku, i cili e kishte simuluar ngjarjen me qëllim justifikimin e shumave të mëdha të parave të xhirove ditore që i kishte humbur duke luajtur lojëra fati.

 Policia arrestoi edhe pronarin e lokalit, Arsid Haxhiaj. Ky i fundit ushtronte veprimtarinë e kundërligjshme të lojërave të fatit, ku menaxheri i karburantit kishte humbur lekët duke luajtur lojëra fati.

 “Nga hetimet e kryera dhe mbledhja e të gjitha provave procedurale është konstatuar se në momentin e vjedhjes një person i maskuar ka zbritur nga një mjet dhe i ka vjedhur me dhunë xhiron ditore shtetasit G. F., 23 vjeç, menaxheri i kompanisë. Në vijim të hetimeve ka rezultuar se shtetasi G. F., për një periudhë 2-mujore ka vjedhur sistematikisht kompaninë ku ai punon duke deklaruar shuma më të vogla se fitimi. Shumën e lekëve të përfituara nga mosdeklarimi, ky shtetas e ka luajtur në lotari të palejuara në lokalin e shtetasit A. H., i cili ka përfituar shuma të mëdha parash nga shtetasi G. F“, thuhet në njoftim.