Makina del nga rruga dhe përplaset me një shtyllë betoni, plagosen rëndë dy të rinjtë

Aksident me pasojë dy persona të plagosur rëndë është regjistruar pasditen e kësaj të diele në Fushë Studen.

Mësohet se dy të rinjtë kanë qenë duke qarkulluar me shpejtësi të lartë dhe dyshohet se në një moment pakujdesie automjeti ka dalë jashtë rruge duke u përplasur me një shtylle betoni të rrjetit shpërndarës të energjisë elektrike.

 Për pasojë nga përplasja kanë mbetur të plagosur rëndë drejtuesi i automjetit dhe pasagjeri, shoku i tij, me dëmtime të shumta në kokë e gjymtyrë.

Ata janë transportuar me urgjencë për në Librazhd ku më pas njëri prej të aksidentuarve është transportuar me helikopter për në Spitalin e Traumës, ndërsa tjetri për në Spitalin Rajonal të Elbasanit.