Agjencia Kombëtare e Mbrojtjes Civile raportoi situatën e zjarreve në nivel vendi gjatë 24 orëve të fundit. Sipas raportimit, janë regjistruar 28 vatra zjarri, nga të cilat 2 janë ende aktive.
Vatrat e zjarrit janë evidentuar në disa bashki të vendit, përfshirë Elbasanin, Durrësin, Vlorën, Finiqin, Selenicën, Himarën, Delvinën, Skraparin, Shkodrën, Vaut të Dejës, Malësinë e Madhe, Tiranën, Kavajën, Korçën dhe Lezhën.
Aktualisht, vatrat që mbeten aktive janë në vendgrumbullimin e mbetjeve në bashkinë e Elbasanit. Sipas informacioneve të Ministrisë së Mbrojtjes, situata në këtë zonë u rëndua gjatë orëve të vona të mbrëmjes. Për të shpërndarë punën dhe për të izoluar zjarrin, u dërguan në vendngjarje 6 mjete të rënda, 5 fadroma dhe 1 eskavator nga bashkia e Elbasanit, si dhe 7 mjete të rënda të subjekteve private.
Këto mjete punuan gjatë gjithë natës, por deri tani nuk kanë mundur ta kontrollojnë dhe të izolojnë zjarrin në landfill.
Ndërkohë ditën e sotme në terren ndodhen 3 automjete zjarrfikëse me 15 efektivë të bashkisë Elbasan, 2 automjete zjarrfikëse me 10 efektivë dhe 1 traktor me zinxhirë nga Forcat e Armatosura dhe po shkojnë edhe 3 automjete zjarrfikëse nga bashkitë e tjera.
Zjarri vijon ende aktiv edhe në fshatin Grazhdan të bashkisë Finiq, ndërsa flakët janë përhapur edhe në fshatin Malçan në një zonë me pisha.
Mbrojtja Civile dhe autoritetet e tjera vijojnë monitorimin dhe ndërhyrjen për menaxhimin e situatës.
Në njoftim thuhet se sot pritet nivel rrezik “I LARTË” në qarqet Shkodër, Kukës, Lezhë, Durrës, Tiranë, Berat dhe Fier, ndërsa në qarqet e tjerë pritet nivel rrezik “I MODERUAR”.
Ndërsa temperaturat maksimale pritet të arrijnë deri në 40 gradë Celsius.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
