Prokuroria pranë Gjykatës së Shkallës së Parë të Juridiksionit të Përgjithshëm në Tiranë përfundoi hetimet dhe ka dërguar në gjyq ish-presidentin e Urdhrit të Stomatologut, Nikoll Deda dhe zv/presidenten A.G., për tre vepra penale: “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”, sipas nenve 135, 248 dhe 321 të Kodit Penal.
Hetimet zbuluan se Nikoll Deda në cilësinë e presidentit të Urdhrit të Stomatologut, ka keqpërdorur detyrën duke rritur buxhetin e organizatës për përfitime personale dhe duke punësuar familjarë pa kriter, për të manipuluar vendimmarrjet e Këshillit Kombëtar që nga viti 2016. Ai është akuzuar për përdorimin e fondeve pa justifikim të duhur, përfshirë pagesa fiktive dhe tjetërsim fondesh në favor të familjarëve të tij dhe të tretëve, duke u bërë subjekt i veprave penale te “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”, të parashikuar nga nenet 135, 248 dhe 321 të Kodit Penal.
Zv/presidentja A.G. akuzohet për vendime financiare të paligjshme lidhur me buxhetin e vitit 2024, duke autorizuar zbatimin e një buxheti të përkohshëm në kundërshtim me vendimin e Gjykatës Administrative, gjatë kohës kur Urdhri i Stomatologut ishte nën masë sigurimi. Kjo ka bërë që ajo të përballet me akuza për shpërdorim detyre dhe veprime në kundërshtim me vendimin e gjykatës.
Kjo shtetase ka autorizuar zbatimin e buxhetit të përkohshëm për një periudhë që fillon nga dita e parë e vitit buxhetor deri në fund të muajit të tretë të tij ku shpenzimet nuk duhet të tejkalojnë 1/12 e shpenzimeve faktike të programit të financuar nga buxheti në vitin buxhetor paraardhës dhe ka autorizuar vazhdimin e buxhetit të përkohshëm duke u bërë subjekt i kryerjes së veprave penale të “Shpërdorim detyre” dhe “Veprime në kundërshtim me vendimin e gjykatës” të parashikuara nga nenet 248 dhe 321 të Kodit Penal.
Materialet e procedimit penal janë dërguar në Gjykatë për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
