Dhunë ndaj babait, vëllait e gruas/ Arrestohen tre shtetas në Tiranë

Raporti i 24 orëve të fundit nga Policia Vendore e Tiranës, njofton kryesisht për dhunë në familje në disa raste.

Kësisoj Specialistët e Seksionit për Hetimin e Krimeve në Komisariatin e Policisë Nr. 3 arrestuan shtetasin - G. Q., 48 vjeç, banues në Tiranë, pasi në rrugën "Don Bosko", në banesë, pas një debati për motive të dobëta, dyshohet se ka goditur me mjet prerës (thikë), vëllain e tij, shtetasin I. Q., 53 vjeç.

I lënduari ndodhet në spital, në kujdesin e mjekëve.

Poashtu është bërë i mundur arrestimi i shtetasit - A. P., 30 vjeç, banues në Tiranë, pasi dyshohet se ka ushtruar dhunë ndaj babait të tij.

Gjatë kontrollit fizik të 30-vjeçarit, shërbimet e Policisë, i gjetën dhe sekuestruan, në cilësinë e provës materiale, sasi lënde të dyshuar narkotike kanabis;

Gjithashtu Specialistët e Seksionit për Hetimin e Krimeve në Komisariatin e Policisë Nr. 5 arrestuan shtetasin E. O., 39 vjeç, banues në Paskuqan, pasi dyshohet se ka ushtruar dhunë ndaj bashkëshortes së tij.

Materialet për këto raste i kaluan Prokurorisë për hetime të mëtejme.