Vodhi katër banesa duke hyrë me çelësa të kopjuar, arrestohet 38-vjeçari në Tiranë

Finalizohet nga Komisariati i Policisë Nr. 6, pas një hetimi disamujor, operacioni i koduar “Kopja”.

38-vjeçari monitoronte banesat që synonte të vidhte dhe hynte në to duke përdorur çelësa të kopjuar, me qëllim vjedhjen e parave, bizhuterive dhe sendeve të ndryshme. 

Ai u identifikua dhe u vu në pranga nga policia.

Hetimet zbardhën katër raste vjedhjeje të kryera me të njëjtën metodë gjatë këtij viti, ndërsa i arrestuari rezulton me precedent penal për vjedhje.

Gjatë operacionit u sekuestruan sende të dyshuara të vjedhura, si dhe veshje të përdorura gjatë kryerjes së këtyre veprave penale.

Operacioni “Kopja” u zhvillua në bashkëpunim me Prokurorinë e Tiranës, me qëllim identifikimin dhe ndalimin e autorit të disa vjedhjeve në banesa.

Në përfundim të operacionit, u arrestua shtetasi B. H., 38 vjeç, i dyshuar si autor i katër vjedhjeve në banesa gjatë vitit 2026.

Policia vijon punën për zbardhjen e rasteve të tjera të mundshme që mund të ketë kryer ky shtetas.

Materialet procedurale iu referuan Prokurorisë së Tiranës për veprime të mëtejshme.