Shërbimi për Çështjet e Brendshme dhe Ankesa ka vënë në pranga një efektiv të policisë në njësinë “FAST Albania”. Sipas njoftimit zyrtar, në pranga është vënë 46-vjeçari me inicialet F. A., i dyshuar për veprën “Shpërdorim Detyre”, “Kallëzim i rremë” dhe “Mashtrim”.
“Shërbimi për Çështjet e Brendshme dhe Ankesat (SHÇBA) ekzekutoi vendimin penal nr. 1016 të Gjykatës pranë Shkallës së Parë Elbasan, e cila ka vendosur masën e sigurimit personal “Arrest me burg” për Komisarin F.A., me detyrë Shef i Zyrës së Kërkimit “Fast Albania” pranë Drejtorisë Operacionale në DPPSH.
Vendimi i Gjykatës së Rrethit Elbasan për masën e sigurimit ndaj 46-vjeçarit u mor në kuadër të thellimit të hetimeve të kryera nga Drejtoria Rajonale e SHÇBA Elbasan nën drejtimin e Prokurorisë së Rrethit Elbasan, në funksion të procedimit penal Nr 1693/2021 për veprat penale ‘Shpërdorim Detyre’, ‘Kallëzim i rremë’ dhe ‘Mashtrim’”, thuhet në njoftim.
Në kuadër të këtij procedimi penal, Drejtoria Rajonale e SHÇBA në Elbasan ka arrestuar më parë në kuadër të ekzekutimit të vendimeve të Gjykatës edhe punonjësin e policisë Inspektor S. F., pjesë e strukturës operacionale të “Fast Albania” dhe shtetasin K. H., person me precedent penalë dhe kriminalë në fushën e trafikimit të narkotikëve. Veprimet dhe aktet proceduriale të përpiluara në ngarkim të tyre u vunë në dispozicion të Prokurorisë Elbasan.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
