Dëshmorë në kohë paqeje/ Numri më i lartë i policëve të rënë në detyrë nga 1990

Enea Mekolli 34 vjeçar është ylli i 232 që i shtohet murit të dëshmorëve dhe pllakatës së emrave në Ministrinë e Brendshme dhe Akademinë e Sigurisë.

Mëngjesi i 4 prillit 2026 nuk do të ishte dita ideale e tij e punës por do të mbetet përjetësisht si dita kur ai dhe efektivë në uniformë betohen se japin jetën për atdheun sigurinë dhe rendin.

Operacioni për kapjen e një personi të kërkuar do të finalizohej tragjikisht me një viktimë dhe dy të plagosur në Lozhan të Korçës.

Enea Mekolli humbi jetën teksa u përballë me agresorin, kolegu i tij, Edison Adri, u plagos e po ashtu i plagosur mbeti edhe autori Violand Braçellari, 46 vjeç.

Braçellari, një emër i njohur për policinë kriminale të Korçës si dhe Repartin Renea, të cilit i kishte shpëtuar disa herë.

Por askush nuk dinte asgjë për vendodhjen e tij, edhe pse ishte në TopListën e të kërkuarve nga Policia e Korçës.

Asnjë gjurmë dhe asnjë lëvizje e tij e dokumentuar deri më datë 3 prill 2026, kur një telefonatë alarmoi policinë.

Dëshmia se një qytetar me profesion bari ishte dhunuar, bëri që policia e Korçës të rikujtohej se ka ende të paarrestuar një person të rrezikshëm, një person të dënuar dhe që mbi 9 vite do duhet t’i kalonte në burg.

Kjo telefonatë zbuloi se dhunues ishte pikërisht personi që kishte mundur t’i shmangej edhe arrestimit të Reneas.