Dy persona në Elbasan kanosin pronarin e një mobilierie për t’i marrë 4 mijë euro, kapet njëri prej tyre

Një person i cili kanosi pronarin e një mobilierie, për t’i dhënë 4000 euro, është vënë në prangat e policisë së Elbasanit, teksa merrte paratë.

Si rezultat i reagimit të menjëhershëm, pas denoncimit të një 50-vjeçari, se kanosej nga dy persona, për t’iu dhënë 4000 euro, specialistët për Hetimin e Krimeve të Rënda të DVP Elbasan kryen një hetim proaktiv, në bashkëpunim me Prokurorinë e Elbasanit, dhe finalizuan operacionin policor të koduar “Mobilieri ”.

Në kuadër të këtij operacioni u arrestua në flagrancë, teksa merrte shumën e eurove, në mobilierinë e 50-vjeçarit, shtetasi P. B., 55 vjeç.

Gjithashtu, si bashkëpunëtor për rastin, u identifikua dhe u shpall në kërkim shtetasi A. K., 23 vjeç, ndërsa po punohet për kapjen e tij.