Ish-punonjësi i Policisë Arbër Sula, është vetëdorëzuar këtë të martë në Komisariatin e Policisë Numër 2 në Tiranë, si autor i dyshuar për vrasjen e shtetasit Jurgen Duka. Ngjarja ka ndodhur në muajin dhjetor të vitit të kaluar, në ambientet e brendshme të një marketi në rrugën “Irfan Tomini”, pas një sherri për radhë.
Policia e Tiranës njofton se ndaj ish-efektivit është caktuar në mungesë masa e sigurisë “Arrest me burg”.
“Si rezultat i presionit të kontrolleve të pandërprera nga shërbimet e Policisë dhe falë negociatave të vazhdueshme me familjarët, mbrëmjen e sotme, në Komisariatin e Policisë Nr. 2, është vetëdorëzuar shtetasi A. S., (ish-punonjës Policie), ndaj të cilit Gjykata e Rrethit Gjyqësor Tiranë, ka caktuar masën e sigurisë ‘Arrest në burg’.
Ky shtetas, më datë 14.12.2021, në një market në rrugën ‘Irfan Tomini’, pas një konflikti për motive të dobëta, ka qëlluar me armën e shërbimit (në kohën kur ka ndodhur ngjarja ka qenë punonjës Policie, jashtë shërbimit), shtetasin J. D., i cili si pasojë ka ndërruar jetë”, njofton policia.
Ish-punonjësi i Policisë ka dorëzuar armën e shërbimit me të cilën kreu krimin, së bashku me municionin luftarak, të cilat u sekuestruan në cilësinë e provës materiale. Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
